Kultura: a trasmissioni 2.0

“Oghje, simu in Niolu”: hè cù sti quattru parolli ch’ellu si scupria di sittembri 2024 u primu filmettu di Kultura.Si tratta di un media criatu da Matteu Pompa è Antò Maria Paoli, dui amichi in brama di sparghja a so cultura è a so lingua nantu à i reti suciali cù un cuntinutu urighjinali, mudernu è di qualità…
Par Brandon Andreani

Navighendu nantu à a tela, à mezu à milioni di filmetti ch’omu pò veda ogni ghjornu, passendu da unu à l’altru in furia in furia, i dui ghjuvanotti facini un custatu : asisti una vera mancanza in fatti di lingua, di cultura è di storia corsa.

Tandu, cù i so idei, a so mutivazioni, un telefuninu è un microfonu, dicidini insemi di crià una paghjina TikTok da fà cunnoscia a cultura di l’isula à i ghjovani corsi prisenti à millai nantu à l’applicazioni.

U primu ughjittivu d’Antò Maria è di Matteu era di prisintà à stu publicu bellu pricisu fatti culturali, tradizioni, festi pupulari o puri parsunaghji storichi.

Inveci, ùn si trattava micca par elli di leghja spiigazioni o cuntà fatti ma di dà a parolla à a ghjenti è soprattuttu à i ghjovani chì prisentani u so mistieri, a so cità o u so associu.

Si pò scopra cusì una ghjuventù isulana chì ùn hà nè vargogna nè paura di sprimasi in la so lingua : una primura è una vera vittoria vistu u successu di l’emissioni!

Abbastanza prestu, parechji parsoni chì ùn ani micca à TikTok ma chì ani vistu i filmetti li dumandani di mettali nantu à altri reti suciali com’è Facebook o Instagram.

Fendu cusì, Kultura riesci à tuccà un publicu sempri più largu cù più di 18000 abbunati in tuttu.

I sughjetti, scelti da i dui criatori di Kultura o fatti da risponda à un invitu sò belli varii: si parla di Pasquale Paoli, di u 173 è di Sampieru Corsu, di festi com’è San Prosparu in Cutuli, San Martinu in Patrimoniu o a Santa di Niolu ma dinò di mistieri (i piscadori, i pastori è i vignaghjoli) o puri d’iniziativi impurtanti com’è Praticalingua Corti, a Casa di e Lingue o a ghjuventù di a squadra corsa.

Da Bunifaziu à u Falasorma passendu pà Carghjese o Peru Casevechje, u podcast ci faci ghjirà a Corsica sana.

Posta ch’ellu si sà chì l’attinzioni nantu à i reti suciali hè assai corta, a maiò parti di u cuntinutu dura trà 3 è 5 minuti fora di dui primi eccezzioni cù sughjetti di primura, veni à dì u viaghju di Papa Francescu in Corsica è po u filmettu di tistimunianzi di i 50 anni d’Aleria vistu più d’un milioni di volti.

Bench’ellu ùn sia u so mistieri è ch’ella sia fatta par passioni, nantu à a paghjina Kultura, tuttu faci pinsà à un travagliu di prufissiunali cù a qualità di l’imaghjini è di u sonu è po cù un risultatu assai piacevuli trà una vera priparazioni è un spaziu lasciatu à l’imprivisti da fà nascia surrisi, risati è cumplicità.

Hè quì dinò ch’omu risenti una vera libertà cù a diversità di i sughjetti, a manera assai nova di trattalli è un passaghju lindu è naturali da u corsu à u francesi.

D’altrondi, a scelta d’ùn metta micca sottutituli currispondi dinò à sta vulintà di firmà in un ambiu naturali com’è in la vita d’ogni ghjornu.

Videndu è sintendu tanti riazzioni pusitivi cù un’attesa forti pà ogni filmettu, calchì mesi fà, Matteu è Antò Maria ani sceltu di travaglià nantu à un antru furmatu più longu cù un travagliu più impurtanti è un pocu di matiriali in più.

Hè cusì chì trà dui missaghji di paci è saluta, di ghjinnaghju scorsu, u publicu scupria smaravigliatu, una bellissima intervista di Maì Pesce chì ci conta tuttu u so parcorsu d’artistu è di militanti : in pochi parolli, 42 minuti di piacè è d’emuzioni.

Kultura cuntinueghja à sviluppassi cù u so furmatu cortu è altri intervisti longhi chì sarani arrighjistrati da quì à pocu è chì, ni semu sicuri, piaciarani assai à chì suvita dighjà u podcast quant’à quilli chì ùn lu cunnoscini ancu!

Intantu, par abbunavvi à Kultura è scopra a qualità di i so filmetti, eccu comu ritruvalli:

TikTok : @_kultura_

Instagram : kultura.corsica

Facebook : Kultura

Linkedin : Kultura

Youtube  : @kultura.corsica