TUTTA A VERITÀ

SOLU A VERITÀ… A ghjurate ?

Matteu Ceccaldi :

iè a ghjurgu ! Allora pudemu principià…

Par Vannina Angelini Buresi

Mi prisentu: Mi chjamu Matteu Ceccaldi aghju 49 anni sò natu in paese , sò merre di Marignana dapoi u 2020, aghju una figliola di 4 anni è sò assistante parlementariu di u deputatu auropeu, Francescu Alfonsi.

1. Par voi, a tarra, chì vole dì ?

A tarra hè u cumunu, sparte i lochi da chì tutti ebbienu da chì fà, da scumbatte, da pudè cresce a so attività. Quì in Marignana, a tarra, hè l’agricultura cù a pruduzzione di farina castagnina è di salameria, a tarra hè quella chì ci face manghjà.

2. Parchè impegnavvi in a vostra cumuna ?
Ghjè u fattu d’esse ingrandatu in paese, d’esse ci andatu à a scola, u fattu dinò d’avè u babbu chè aghju. Aghju una leia à a tarra è cù u me paese particulare è aghju a voglie d’aiutà à tutti da ch’elli sianu bè in paese.

3. Da fà campà u rurale è i paisoli, chì ci vole à fà?
Elettu dapoi u 2008 è merre dapoi u 2020, ci sò sempre e listesse primure, avemu avutu u tempu di riflette, ma ci vuleria più alloghji, pocu case da pudè stallà famiglie è pocu travagliu. Avemu 8 appartamenti cumunali. Tutti i paesi anu e listesse dificultà, podassi cù a Fibre è a 4 G chè no aspittemu da quì à pocu, certi puderanu stà in paese, travagliendu in casa soia.

4. In tantu chè merre, qualesse sò e vostre dificultà ?
Aghju dighjà mintuatu e nostre dificultà ma l’imbroglii administrativi chè no pudemu scuntrà in e nostre cumune ùn ci aiutanu micca, par tuttu ci vole à fà dumande! Ci vole à dumandà subvenzione da realizà prughjetti è e dimarchje ùn sò micca faciule.

5. I vostri prughjetti?

Rifà certe strade, certi lochi sò periculosi, a ghjesgia hè aghjà stata rifatta, Ci vole à compie tuttu u ghjettu di i cundotti; Ci sò dui altri paisoli dinò chì facenu parte di a cumuna, Chidazzu è Revinda, hè un prughjettu di 200000 euri . Fà chjassi in leia cù u patrimoniu è a storia di u paese è di a Corsica, divemu mette in ballu l’epica di a resistenza cù quelli sbarcati di U Casabianca chì sò passati par Revinda, una storia scunnisciuta.

6. Chì Sucetà chì prughjettu par A Corsica, sicondu à voi?
Una sucetà appaciata, incù più spartera à u nivellu di e ricchezze, una sucetà più ghjusta duve ognunu pudaria vince a so vita è campà abbastanza bè.

7. L’autunumia sì ne parla di più in più, a vidite cumu?
L’autunumia si deve cunstruisce vicinu à a ghjente cù cio ch’ellu ci vole à piantà è cio ch’ellu ci vole à fà. E decisione devenu esse pigliate da un gruppu largu.

8. Rigreti n’avete?

Quale hè chì ùn ne hà ? Circhemu sempre a piglià e decisione e più ghjuste, cù a spirianza, sò piuttostu aghjustamenti

ch’ellu ci saria vulsutu fà ma ùn sò micca rigreti.

9. Chì ricuminciariate?

Pensu tuttu chì à l’epica ciò chè aghju fattu aghju circatu di fà lu par u megliu. Ma cum’è l’aghju detta ricuminciariu tuttu cù aghjustamenti.

10. Sete in esiliu, vi tocca à cambià di locu incù a cundizione d’esse impegnatu in pulitica altrò. Induve andate è parchè?

S’ellu era arimane avariu rispostu l’Irlanda, ma oghje andariu in America chì sottu à Donald Trump ci hè u periculu.

11. Avà, scuntrate à Emmet Brown un parsunnaghju di fizzione, u prufissore «scemu» di «Retour vers le futur», vi permette di vultà cù a sò vittura, in un’altr’epica, a qualessa scigliite?

À l’epica di U Medievu è di a Rinnascita in Italia.

12. Intirvista compia, hè compia a vostra vita (bella sicura, u più tardi pussibbule!). Hè ghjunta l’ora… Vi ne cullate in paradisu, San’Petru v’aspetta è vi lascia trè favore:

A prima: Par l’eternità di stà vi ne vicinu à qualchissia chì campa quassù. Minnana, quelli di a famiglia ma sopratuttu a me minnana.

A siconda: D’avè u putere di cambià qualcosa nantu à sta tarra è micca forse in Corsica.
Fà chì u cambiamentu climaticu piantessi.

A terza: Di vultà prestu in casa à circà un oghjettu caru.
Un ritrattu di me zitelettu in e calanche di A Sarrera, devu avé 7 o 8 anni, hè par u ricordu di u mumentu.