Saria ora…

Ùn vene tantu difficiule di figurà si, mentre issi primi di lugliu, u sullevu ch’elli ponu risente i liceani è forse a gioia chì sbotta, s’elli sò riesciuti à buscà si u so bascigliè ; prima ch’ellu mutessi forma è quantunque e critiche ch’ellu riceve issu diploma, causa di una corsa à vita persa appressu à statistiche da megliurà, fatticce in fatta fine, ma chì permettenu di suddisfà a vanagloria di certi è di scumpete cù altri paesi, scurdendu si spessu di i sculari stessi.

Petru Santu Menozzi

È puru, quandu chì deverianu apprufittà di piccule stonde prive di penseri, sò numerosi oghje à firmà avvinti da u dubbitu, inchieti è dilusi in quantu à u seguitu di i so studii universitarii. Di fatti, per via di Parcoursup, piattaforma nova per l’ammissione inde l’insignamentu superiore, un terzu di i candidati sò sempre in l’inforse, aspettendu una risposta o bramendu ne una chì currispondi di più à e so dumande. Bisogna à ramintà chì, mesi fà, a so messa in opera avia cagiunatu mosse studientine è liceane accanite – u situ di Tolbiac ne era l’esempiu caratteristicu – postu chì ci vedianu una manera di fà, in sottu sottu, una selezzione à l’entre di l’università. In un certu modu definia dinù missione altre per l’insignanti di liceu chì li si aghjustava a carica di l’urientazione di i so sculari puru s’elli ùn anu forse a furmazione da pudè la assume. Trattendu si di a Corsica, in quantu à issa prublematica, ci hè da stupisce si ch’elli ùn si ne fussinu impusessatu si i sindicati studientini. Soca e riforme decise da mare in là ùn ci arriguarderanu, forse ch’è no avemu l’impressione ch’elle ùn francanu i liturali di u cuntinente da ghjunghje finu à e nostre sponde, sarà ch’ellu esiste un altru inciampu chì ci impedisce di parlà di cuntinuità territuriale vera. Ci vuleria tandu à dumandà si chì sò e primure suciale di i sindicati è s’elli ci portanu un interessu qualunque. Ùn surtendu da i limiti sculari, l’affare di unepoche di copie di u bascigliè è di u brevettu scritte in brittonu, sente u mucidu una cria è face spuntà discorsi à l’anticogna.

U periculu di e lingue

Dicendu la à l’accorta, unipochi di sculari esciuti da e scole Diwan – rete di scole assuciative laiche è gratisi chì praticheghjanu un insignamentu immersivu Trdi u brittonu è chì anu festighjatu annu scorsu i so quaranta anni – anu sceltu per a so prova di matematiche à u bascigliè di rende e so copie in brittonu, altri anu fattu listessa scelta per a prova di scenze à u brevettu. Puru s’ella hè certa ch’ellu ci hè in issu attu un aspettu rivendicativu è al dilà di quellu simbolicu, pare ch’ellu si iscrivi quantunque in un filu naturale. È, tandu, hè a risposta di u retturatu di Rennes à fà si sprupusitata, postu ch’ella hè stata decisa di piglià in cunsiderazione, per a currezzione, solu e parte scritte in francese. Cum’ella hè stata sottulineata da i liceani, esiste una incuerenza trà a so furmazione, u so prugramma sculare fatti in brittonu è l’impussibilità di cumpone in issa lingua, puru s’ella hè stata una dumanda cuntinua indirizzata à l’Accademia è à u Statu. L’impussibilità o u ricusu di stabilisce un dialogu trà sculari è stituzione hà incuragitu i liceani à piglià e so respunsabilità, scegliendu di fà valè un dirittu soiu. Da qualificà issa scelta, hà impiegatu a stampa un vucabulariu una cria sprezzativu : si appetta l’interdizzione è si disubbidisce. U discorsu amministrativu si accuntenta ellu di incalcà à nantu à u fattu ch’elli sò tutti i liceani sottumessi à listesse cundizione è regule. Significheria tandu issu principiu di ugualità a negazione di e specificità è una prumossa di l’unifurmizazione, moltu più quandu si pensa chì una lingua insignata puderia purtà preghjudiziu à un esame.

In scola

Ci avvedimu subbitu ch’ella spunta quì una seconda incuerenza ancu di più prufonda chì vene accumpagnata da issa dumanda : cumu capisce a voglia di l’Educazione naziunale d’incuragisce u bislinguisimu, l’insignamentu di e lingue dette regiunale in iscola, s’ellu ùn li dà à a fine di u percorsu sculare una cuncretisazione per via di un usu accunsentutu mentre l’esami. Sarà chì ùn hè ancu à mutà a manera di percepisce e lingue è ch’ella ferma sempre issa ierarchia pulverosa. Si pò pensà dinù chì e misure cuncesse per e lingue ùn sò franche da un certu fulcluralisimu, viste ch’elle sò da accessorii di poca utilità in u cutidianu di e persone. Sò turnati tandu à fà si sente è à palisà si, ma ùn eranu tantu ascosi, discorsi sparti inde l’opinione publica chì anu integratu l’ideulugia di una unicità linguistica di u paese chì a diversità risicheria di mette in periculu è chì l’azzione da prumove isse lingue ùn sarianu chè un abissu finanziariu di pocu interessu. Hè per via di quessa chì, per ciò chì tratta di a Corsica, saria ora di fà valè un pianu per a lingua chì ùn aspettessi tantu affare da u Statu.