Diversità face…ricchezza

Un sintimu propriu chì omu cerca à asconde da ch’ellu ùn sia avventatu da a ghjente, un muvimentu internu chì ci avvia ver’di cose vane o pessime ma chì pussedenu quantunque a capacità di allusingà, dice cusì u dizziunariu per a parolla tentazione. È ùn amminteremu micca u so significatu religiosu zeppu assai.

Petru Santu Menozzi

S’ellu si sceglie di parlà ne oghje, ùn hè mancu appena vulintà di veste i panni di chì predicheghja da fà si u ghjudice di un qualunque tribunale di a murale. Saria in un certu modu una manera di piglià l’arrivinte prima di avvicinà si à un affare chì ci stuzzica per issi lochi. Qualcosa di piattu ma chì ùn smettia di travaglià in sottu sottu, ch’è no ùn avemu sculinatu subbitu – una forma di passività li hà lasciatu un spaziu tamantu à occupà – è pare ch’ellu avessi pigliatu u so slanciu, circhendu à impone si, sti pochi tempi. Sarà adatta a parolla tentazione da insegnà issu fattu, forse, ma ùn ci hè certezza alcuna. A tentazione di u pensà unicu chì tene, si pò dì, in u so senu una forma di viulenza. U pensà unicu ci affranca di i parè cuntrarii è di a custruzzione chì si face à pocu à pocu in u dibattitu, duru ogni tantu, in u dialogu. Forse certi ci truveranu u so tornacontu. In tutti casi pone a dumanda in a nostra sucetà di l’esistenza di a diversità di i punti di vista chì ella, face ricchezza. Puru s’ella hè palisata è difesa – fendu a prova di u ghjudiziu – ùn sarianu chè apparenze, u so rispettu ferma illusoriu. Issu prucessu in anda u pudimu leghje in e reazzione à unipochi di articuli di a stampa à nantu à e rete suciale soprattuttu, chì si assumiglianu, scredibilizendu l’autori, à una censura. U fenomenu u pò scorge omu ancu in e relazione trà a stampa è u mondu puliticu in Corsica. Si penseria à issi ghjochi periculosi di seduzzione è di ammasgiulera chì diventanu, quand’ellu hè traditu issu amore – fintu appena -, misfidenze è odii à le volte, un « je t’aime moi non plus ». Si sà, u puliticu hè un funambulu in equilibriu incertu à nantu à u filu fine di u sensu di e realità, ogni eccessu soiu, ogni azzione chì ùn hè chjara abbastanza, o cuntraria à i so ingagiamenti, s’ella hè rimarcata è publicata – è a deve esse di altronde – u pò fà capiciuttà. Si rispunderia « è allora ? », ùn hè quessa dinù a rispunsabilità di l’omi pulitichi ? Tandu, hè strana di sente ne unipochi lagnà si quandu chì ciò chì ùn và hè messu in risaltu è hè risentutu cum’è una offesa persunale – massimu chì in a nostra sucetà di prussimità, spessu, ùn ci sò solu leie di cunniscenze ma dinù di amicizia o intime. Hè quì ch’ellu spunta u paradossu, s’incuragisce l’obbiettività quand’ella hè indirizzata à l’altri, è vene chjamata quessa parzialità, ingannu è cumbriccula quandu si tratta di sè stessu. Soca sarà un’attitudine nurmale oghje chì a moda, ch’ella sia per quelli chì sò à u putere o per u so fan-club accanitu, hè volta di più ver’di l’autocelebrazione chè versu l’autocritica salutifera. Sarà un segnu di a salute di a demucrazia di cunsiderà chì u ghjurnalistu fussi incaricatu di a prumuzione di l’azzione pulitica, ùn interrughendu la mai ?

Infurmazione in periculu

Bella sicura, certi ghjurnalisti accettanu issa manera di funziunà, a volenu mantene è a sviluppanu, tessendu leie più chè strette cù pulitichi è attori ecunomichi, u putere chjama u putere puderia firmà da pruverbiu. L’infurmazione, è u discorsu chì l’accumpagna, prudutti tandu diventanu i servi di partiti, d’ideulugie, d’imprese, mudellendu l’opinione publica è ùn sullicitendu u so sguardu criticu. Participeghja quessa à inghjulià l’inseme di a cumunità ghjurnalistica, mandendu in pezzi deuntulugia è etica. Hè cusì ch’ellu analizava a situazione prisente Serge Halimi in u so « Les nouveaux chiens de garde ». Eppuru issa prufessione hè oghje in periculu è hè rimessa in causa : una inchiesta publicata à nantu à u situ di l’Assisi di u ghjurnalisimu di Tours, dice chì un ghjurnalistu interrugatu à nantu à dui si hè digià fattu insultà causa di u so mistiere, è ch’ellu saria cresciutu un sintimu di misfidenza di pettu à issa prufessione. È a so indipendenza minacciata, postu ch’ella hè per accelerà si a cuncentrazione di i media, per via di comprere, trà e mani di pochi capi d’impresa, d’industriali è ch’ellu pesa di più in più u finanziamentu di l’annunziadori. Hè per quessa chì, à dì la franca, ci hà impenseritu è fattu dubbità a pussibilità chì unipochi d’industriali – chì tenenu centri cummerciali è cumpagnia marittima – pudessinu entre in u capitale di a stampa lucale isulana. U libru « La presse, le pouvoir et l’argent » di Jean Schwœbel chì fù u primu presidente di a prima Sucetà di i redattori in Francia (quella di Le Monde), publicatu in u 1968 è reeditatu à u mese di marzu porghje riflessione chì anu propriu un’attualità di pettu à e prublematiche oghjinche.». L’Assisi di u ghjurnalisimu quist’annu ponenu a dumanda di un ghjurnalisimu utile. Hè certa chì in issu ambiu di « cumplottisimu » è di pettu à e cusì dette fake news, u ghjurnalisimu hè una necessità.

Sguardi altrò

Bisogna à esse cuscente, fighjendu in Auropa è altrò, di a vulnerabilità di i ghjurnalisti quandu chì si accatamanseghjanu pressione varie è chì u putere si face arbitrariu. Si pensa à u casu recente di Mehmet Altan, in a Turchia di Erdogan. Ghjurnalistu è rumanzeru, hè statu cundannatu à a prigione à vita, incausatu di avè vulsutu lampà l’ordine previstu da a Custituzione. Si ponu ammintà i ghjurnalisti messi sottu à una prutezzione pulizzera, minacciati ch’elli sò da a maffia, o l’assassiniu, di ottobre scorsu, di Daphne Caruana Galizia in Malta per via forse di u so blog ch’ella avia duve ci dinunciava affari di curruzzione. U listinu di’ssi esempii si puderia allungà torna chì si multiplicheghjanu situazione simule. Sò un indicatore di una malatia chì si sparghje, un spechju di a sucetà induv’è no campemu, di u so statu pessimu è di a debbulezza di e nostre demucrazie.

Exergue Issa prufessione hè oghe in periculu e hè rimessa in causa