Loading...
Vous etes ici :  Accueil  >  Archives  >  Current Article

Tribune Lingua Corsa: septembre 2017

By   /   2 octobre 2017  /   No Comments

Acqua in bocca

S’ellu si pò fà un bilanciu criticu di ciò chì si hè scrittu finu à avà – ma u resultatu ùn hè mancu appena assicuratu capunanzu – si avvede subbitu omu ch’ellu ùn si hè discorsu, guasi, chè di pulitica mentre un annu è più

Petru Santu Menozzi

Seguitendu ne e vicende, fighjendu la segondu anguli sfarenti, cuntrastendu – omancu si hè pruvatu – punti di vista da avvicinà la, guardendu la ancu inde l’ochji da esse ne ipnutizati à fattu. Soca era per via chì e tematiche c’imprimuravanu è, bella sicura ne avemu trascuratu tante altre chì pudianu avè di più impurtanza o interessu. Tandu da ùn esse ne saziu – per ùn dì stumacatu à le volte – bisugneria à fà cum’è cù certe medicine, piglià ne ma sempre cù misura. Oghje, megliu à apprufittà di i primi di lugliu, di l’idea di u rifiatu ch’ella ci arreca a stagione statinaghjola, pruvendu à scurdà – riesce ci propriu vene difficule chì a stonda di l’appaciata hè sempre finta – a sicchia annunziata, l’incendii, l’ingorghi… è truvendu un sugettu chì accuntentessi à tutti senza matriculà ci e cerbelle. È volta è gira, si ciotta quantunque in a pulitica o si crede ch’ellu hè l’unicu penseru, cù u risicu tamantu di ripete u listessu affare allunghendu si la troppu, masimu chì dicembre ùn hè tantu luntanu è chì per unipochi l’orizonte hè ingumbratu digià da e prussime elezzione.

Aghjustendu chì ùn si puderia piantà cusì faciule una corsa di fondu chì ci cunduce da una « rivuluzione » à un’altra – una parolla propriu banalizata sti pochi tempi – mentre un viaghju chì ùn si assumiglia micca à u ciambuttime chetu di u mare. Dicendu la appena di manera scherzosa, si cerca un equilibriu chì avemu a « Storia » fin’à a cinta è si cerca à pisà u capu da ùn annigà si, da ùn esse purtatu via da una matarusciata scatinata. Simu i spettatori di una storia chì si scrive è ùn ci hè modu di scantà si un pocu da arripusà si. Dunque, ammintà una parolla critica avà chì si hè fattu u cunsensu – un cunsensu di a facilità forse, illusoriu una cria è ch’ellu ci vuleria à scavà di più – à chì prò ? S’ellu ùn hè per u piacè solu di circà rogna da grattà o di diciulà da rompistacche in sempiternu, sarà per custringhje ci à fà una piccula arretta è à travaglià a nostra lucidità.

 

Pusture inquisituriale

U primu custattu hè ch’elli sò i spazii à mancà, chì mettenu e persone in cuntattu, duv’elli si ponu sviluppà dibattiti è discorsi assinnati, puru cuntrarii, in un quadru assirinatu. Induve un parè puntellatu da argumenti pò esse ascultatu prima di esse mandatu à caternu. Ùn si puderia pensà mancu appena à e rete suciale da fà da locu di cuntrastu chì sò quelli di a risposta subitania è di a sintenza cruda. À esse liata à issu prublema ci saria un’altra interrugazione, quella di sapè s’ella hè pronta a ghjente à fà u sforzu di accettà è capisce parolle critiche senza ch’elle fussinu percepite cum’è un attaccu o un sacrileghju ancu chì, una critica vulsuta custruttiva ùn pò sempre esse appreziata cum’è illegitima quand’ella trapassa cunsiderazione persunale.

Saria listessa, macagnendu, di difende a libertà di sprime un avisu criticu fin tantu ch’ellu ùn si dice nunda. Bisugneria tandu à fà la finita – hè detta quessa senza pretensione alcuna – cù e pusture inquisituriale numerose chì anu per scopu di perseguisce a minima parolla cuntraria è di stippà si appressu à ella cù l’inghjulia appruntata, da alliscià è vantà ciò chì pare u pensamentu maiuritariu – a cecaghjine ogni tantu hè chjuccuta una cria. Quandu chì, si sà, u dubbitu hè unu di i mezi prediletti da fà si strada è l’autucritica segnu di maturità (in pulitica dinù). Averemu forse bisognu di una pedagugia di a presa di parolla da ùn cascà in a trappula di l’autocensura chì u risicu saria di diventà indiferenti, in u sensu ch’ellu intendia Gramsci, vene à dì quelli chì preferiscenu a passività invece di participà à un dibattitu franchendu si da e respunsabilità chì, u fattu di sprime si hè ancu attu citadinu.

 

Trapassà una identità

    Print       Email
  • Published: 2 mois ago on 2 octobre 2017
  • By:
  • Last Modified: octobre 2, 2017 @ 7:56
  • Filed Under: Archives

Facebook Iconfacebook like buttonTwitter Icontwitter follow button