Loading...
Vous etes ici :  Accueil  >  Archives  >  Current Article

Tribune Lingua Corsa – avril 2017

By   /   2 mai 2017  /   No Comments

Ch’acceghi !

U geniu, Balzac, l’avia. Dubbiteghju chì unipochi principianu digià à capighjà dicendu si chì, s’ella hè per leghje ghjudizii simuli è cusì cunvenuti, forse ch’ella ùn vale à dà ci capu.

Petru Santu Menozzi

Ma ùn si hà da ammintà a so maestria di l’arte rumanzesca, piuttostu quella di a scelta di i so tituli chì, spessu, sprimenu à tempu issu passa è vene trà precisione necessaria è allarghera. À un rumanzu, u titulu li dà una unità, insegna ciò ch’ellu sarà u racontu dendu ne a tematica, pò dinù avvià u sensu di a lettura o fà da fisica da ingannà u lettore quand’ellu si stà sempre à l’inforse nant’à u mutale. Ci sò di i tituli chì sò riesciuti à affrancà si da u so rumanzu per campà à di per elli. Eccu li diventati spressione entrute, à le volte, inde l’usu cumunu. Tandu a li facenu à adattà si à situazione diverse, à dipinghje mumenti da schjarisce li cù un lume altru, in tantu ùn allunghemu a funa… « Splendori è miserie… » basteria à riassume l’attualità di’sse poche settimane. « L’illusione perse », l’infrasata dice tuttu è ribomba ancu per e nostre sponde. D’altronde ci ne saranu sempre oghje à avè ne ? Casu di sì, questi circheranu forse à rassicurà si chì, l’illusione sò cum’è i pruiettori mentre un spettaculu, abbagliuleghjanu di sicura, è à spessu accecanu quelli chì i fideghjanu troppu. In tutti casi, hè affare di visione – pulitica – è à certi quessa li mancherà appena avà o ùn l’averanu spressa di manera chjara abbastanza da fà si sente da tutti.

Ghjoccu di seduzzione

Un custattu quantunque vene faciule à fà quì, s’è no apparagunemu u cuntestu puliticu cuntinentale tribbulatu, è si puderà dì listessa fighjendu altrò, cù quellu di l’isula. U casu di a Corsica face da eccezzione, cum’è di solitu soca. Ind’è noi hè u statu…di grazia à esse prulungatu di modu cuntinuu dapoi un annu è più, è à ingutuppà l’eletti di a mandatura nova, è ricunniscemu la soprattuttu qualchì persona in particulare. Hè strana di assiste à a custruzzione di a fiura di un omu puliticu ideale, guasi vestutu cù i panni di l’omu pruvidenziale. È s’è l’upinione u si raprisenta cusì, sarà per u citadinu aduttà una forma di passività, ùn participendu di manera attiva à a vita di a cità. Venerà forse da una prisenza – ùn diceremu eccessiva – in i media è nant’à e rete suciale duve à ogni minimu attu li si dà una impurtanza sprupusitata, finu à un ducumentariu ludativu una cria. Tandu, fà a pulitica si avvicineria di più à un ghjocu di seduzzione, superficiale appena. Certa hè cambiata a manera di cuncepisce la a pulitica è codici novi sò stati imposti. Eppuru, ùn significheghja ch’ellu ci vuleria à tutti i patti cunfurmà ci si, ammasgiulendu a ghjente è pruvendu à accuntentà à ognunu da ùn dispiace micca. Saria propriu un isbagliu di lascià si inchjustrà in u persunagiu di « persunalità preferita » – masimu quandu si pensa ch’ella hè una custruzzione fugace di i sundami – è di esse scunvintu ch’ella puderia durà in sempiternu. Faria prò di mette appena di distanza è di lucidità, scegliendu l’azzione cuncrete da mette in risaltu è ùn lascendu si chjappà forse da ciò chì si assumiglieria à u prumuziunale solu.

Fiascu eletturale

Ci hè da dumandà si dunque s’ellu ci hè u bisognu, urgente, d’innalzà statule cusì prestu chì, quand’elle principianu à sbrisgiulà si, u ritornu à a realità si face di più crudu è amaru, è po i trampali chì spuntanu à l’ispensata ùn mancanu. Rimarchemu dinù una tendenza chì puderia diventà un inciampu, à longu andà, quandu chì un omu pare impersunà un muvimentu puliticu sanu. Issa persona ùn saria sola portavoce o raprisentante di un inseme ma l’unica à esse visibile. Si pone tandu a dumanda di un rinnovu di un persunale puliticu è bella sicura di a so furmazione, chì legà u percorsu di un omu è e so vicende, di modu strettu, à un muvimentu pò inghjennà difficultà parechje. Basta à pensà à e pussibilità di fiascu eletturale è di e questione chì sbucceranu à issu mumentu.

In u listessu tempu, pare esse si ammutulita a parolla critica, quella chì si vuleria custruttiva, o allora saranu voce lampate in u desertu. À quellu chì pensa pudè dì a soia, li si rimpruvereghja subbitu di vulè la fà, rinfaccendu li ch’ellu si campa un « mumentu storicu », è ch’ella fù « tamanta a strada », prima di sbuccà ci. Puru s’ellu hè lecitu di lascià à u sentimentale una piazza, chì ùn fussi troppu larga quantunque, ùn deveria appannà u sguardu è fà da artifiziu retoricu per impedisce ch’elli spuntessinu parè opposti.

Dicendu la à l’accorta, è per cunclude, da illusione à dilusera, fora di une poche di lettere, s’è omu hè attente appena, pò guasi sente listessa musica ind’e parolle. È po basta pocu da francà u passu da una à l’altra.

    Print       Email
  • Published: 4 semaines ago on 2 mai 2017
  • By:
  • Last Modified: mai 2, 2017 @ 9:15
  • Filed Under: Archives

Facebook Iconfacebook like buttonTwitter Icontwitter follow button